تصحيح وضع اجنبيه من مواطن سعودي وعندنا اطفال
نينا:
السلام عليكم ورحمة الله وبركاته
تفاصيل سير معاملتنا تصحيح وضع اجنبيه من مواطن سعودي وعندنا اطفال) كانت بداية المعاملة ١٤٤٣/١٢/١ خلصنا الاوراق المطلوبة وانتظرنا لبعد العيد وتحولت للمحافظة بتاريخ ١٤٤٤/١/٢٠ الرساله كالتالي: (معاملتكم رقم بمحافظة ضمد جلست يومين وصدرت الى امارة منطقة جازان تاريخ ١٤٤٤/١/٣٠ قيدت
⁃ تحت الاجراء جلست عندهم حتى ١٤٤٤/٤/١٥ وتحولت وزارة الداخلية جلست شهر بالضبط وصارت مغلق دقينا عليهم قالوا تصدرت للأمارة بخطاب مساءلة عن الزواج وصلت ١٤٤٤/٧/٢ للشرطة وطبعًا رد زوجي عليهم جاهل في النظام وماعندي اي معلومات عن نظام الزواج من الاجانب ومشوها ورجعت من الشرطة الامارة
⁃ تحت الاجراء شهر ونص تقريبًا وفي ١٤٤٤/١٠/٢٥ تحولت وزارة الداخلية بالحقوق الخاصه بعدها بعشرين يوم بالضبط صارت مغلق وحولوها الشؤون الامنية من ١٤٤٤/١٢/١ حتى ١٤٤٥/٢/١١ جتنا رسالة من الداخلية تم تحويل المعاملة الى وزارة العدل
⁃ تاريخ رسالة ناجز ١٢-٠٢-١٤٤٥ وكان نص الرساله كالتالي: (صاحب الهوية ******** نشعركم بوجود معاملة لكم لدى الإسناد المركزي للتوثيق لتوثيق (معاملة رقم )، يمكنكم التقدم بطلب جديد من خلال خدمة (توثيق حالة اجتماعية) عبر البوابة الإلكترونية (ناجز) لاستكمال إجراءات التوثيق من خلال الرابط التالي: https://s.moj.gov.sa/2y7hw7recf) الطريقة انك تختار توثيق زواج سابق ونعبي البيانات الولي والزوج والزوجه واثنين شهود.
وهنا كانت الحفلة انا ماعندي ابشر عشان تجيني رسالة التصديق وماكنت فاهمه انو عادي يقدرون يرسلونها لي من ناجز نفسه اذا كلمتهم انو ماعندي ابشر على بالي ما تجي الا يكون فيه ابشر المهم عبيت الطلب وارسلته ورجع الطلب يبغون تاشيرة الدخول وانا ماعندي وتحطمت احسب بتروح علينا الموافقة لين الله هداني كتبت لهم في الطلب انا ماعندي أبشر ولا تاشيرة دخول ماعرفت نفسي الا في السعودية من يوم انولدت لا طلعت ولا دخلت والحمدلله قبلوا كلامي ودقوا علي الوزارة وكلمتني وحده وقلت لها وضعي كامل الحمدلله قالت تمام طيب الولي اللي عقد لك وينه قلت لها متوفي من زمان قالت حلو ارفقي شهادة الوفاة ولا حصر ورثه وكلهم مافي قلت لها اقولك يا بنت الحلال انا ادمية ماعندي الا اوراق من المستشفى والشرطة تثبت انو ابويا متوفي حصر وشهادة وفاة مافي وقفلت منها وارسلوا الطلب من جديد ارفق اوراق ابويا انو متوفي ارفقتها وكلمتهم في الطلب انو انا اهلي كلهم متوفين وابويا متوفي وماعندي لا اخوان ولا اقارب وذي كل الاوراق اللي عندي ارفقتها والحمدلله بعدها بثلاثه ايام ارسلوا روابط المصادقة لي وللشهود و زوجي وجتني عن طريق ناجز رساله نصية بالمصادقه صادقنا وبعدها بيوم جتنا الوثيقه
الاوراق اللي يطلبونها منكم ترفقونها شهادات الاطفال مع عقد الزواج السابق مع اوراق للولي اللي عقد لكم مع صورة الجواز والتاشيرة لو موجودة وبس بعد المصادقة بيوم تجي الوثيقه/ ولا تسمعون الكلام ابدًا قدموا وتوكلوا على الله والشيء اللي مكتوب لكم بتاخذونه واللي يقولون غرامه ومدري وش وعقوبات كذابين وربي يوفق الجميع ما اقولكم تزوجوا بدون موافقة بس اللي تزوجوا وخلاص خالصين لا تخافون من الكلام ترى اكثرهم يخوفون الناس بالباطل وبدون اي مصداقية الله يسامحهم وبس عمومًا الله ييسر لكم الموافقة بكل يسر وسهولة واي سؤال حياكم بإذن الله مانقصر
بفضل وتيسير من الله عدت الحمدلله
لا تيأسوا أبدًا اكثروا من الاستغفار و الحوقلة
الامل وحسن الظن بالله وسورة البقره لها اثر كبير 🤍
تتيسر تتيسر كل شي وله حل وكل طريق وله مخرج ربي مايحطنا في مكان الا راح ييسر لنا الله يكتبها لكم بالخير
الضوابط الصحية اللازمة للزواج من طرف غير سعودي والتحديثات التي طرأت عليها وهي كالآتي:
• تمديد مدة صلاحية الفحص الطبي لزواج أحد طرفيه غير سعودي لتصبح سنة واحدة من تاريخ إصداره بدلاً من ستة أشهر.
• إلغاء اشتراط إجراء الفحص الطبي لزواج أحد طرفيه غير سعودي في مراكز فحص محددة، ويمكن إجراؤه في أي من مراكز الفحص الطبي قبل الزواج في منشآت القطاعين الحكومي والخاص حسب التنظيمات المعتمدة.
• أن يتم إصدار تقرير فحص إلكتروني خاص بزواج الطرف السعودي من الأجنبي مزود برمز شريطي (Barcode) من منصة «صحة»، ويكون هو التقرير الوحيد المعتمد من جميع القطاعات لصحية المعتمدة بوزارة الصحة أو خارجها ولا يقبل غيره.
• لا يتم إجراء فحوصات ما قبل الزواج لمن هم أقل من 18 عاماً في حال كان أحد طرفيه من الجنسية غير السعودية إلا وفق ما تضمنته الفقرة التاسعة من نظام الأحوال الشخصية.
المصدر: صحيفة عكاظ